ارحموا اهلي بقه!

:الإخوة و الأخوات”* اللي بيمشوا في الشارع، الرجاء مراعاة الآتي”

1- لما تيجوا تعدوا الزفت الشارع بلاش خطوط مايلة لا بمواجهة العربيات و لا وانتم مدينها ضهركم، عدوا في خط  عمودي على الرصيف

2- اتنيلوا بصوا قدامكم و انتم بتعدوا الشارع

3- عدوا الشارع بسرعة و بهمة، بلاش مشية البطة التهايهة المتأملة في ملكوت الله تحت بند ان الجاموسة اللي سايق/سايقة مايقدرش يدوسكم… هو/هي مش عايزين يدوسوكم بس ممكن الموضوع في ثانية يخرج عن ايدهم لو جالهم شلل و رجليهم تقلت على دواسة البنزين

4- و انتوم بتعدوا الشارع بلاش ترقصوا الناس اللي سايقة وحياة اهاليكم، دي مش أتاري

:الإخوة و الأخوات”* اللي بيسوقوا في الشارع، الرجاء مراعاة الآتي”

1- لما تيجو تطلعوا من ركنة “افقية و موازية للرصيف” خدوا في أهلي و في أهل أمثالي ثواب و بصوا في المراية الجانبية (اللي ناحية الشارع) قبل ما ترموا بوز عربيتكم المصونة في الشارع… و يا سلام لو ضربتوا اشارة (اللي ناحية الشارع برده)… لو مفيش مراية أو مكسورة، الوحوا رقبتكم عدل و لو الإشارة بايظة طلعوا دراعكم من الشباك و شوحوا لكن أرجوكم مش مرة واحدة هييييه بوز العربية بقى في الشارع من حيث لا ادري

2- لما تلاقوا حد من اللي فوق  دول مرة واحدة قدامكم، لو سمحتم بصوا في المراية اللي جوة العربية (اللي في النص دي)، لو وراكم فاضي دوسوا فرامل و هدوا و لو لزم الأمر اقفوا خالص و متنسوش تدوسوا انتظار و انتم بتبصوا في المراية… لو اللي وراكم كابس، بسرعة بصوا في المراية الجانبية (اللي في الناحية اللي هتحدفوا عليها) و لو فاضية أمركم لله احدفوا (بس و انتم مديين اشارة أو حتى مدلدلين ايديكم) لو بايظة بايظة، بلاش تحدفوا لأن كدة بتزودوا احتمال حدوث حوادث أكتر

3- بلاش تكبسوا ورا حد عشان ممكن السيناريو اللي فوق يحصل

4- ياريت لما تلاقوا حد بيطلع من ركنه بأدبه تساعدوه بإنكم تهدوا و تدولوا فرصة يطلع بسلام… و لو مش بأدبه،اعملوا بأصلكم، المسامح كريم، لو كان ينفع الواحد يربي الناس واحد واحد في الشارع مكانش زماني قاعدة بكتب النوت دي

5- يا ريــــــــت تبصوا على الشارع مسافة عربيتين تلات عربيات قدامكم و متحصروش اهتمامكم بالعربية اللي قدامكم و بس عشان اللي قدامكم ممكن يكون مسطول/مسطولة أساسا

6- بلاش تتسطلوا و انتم سايقين

7- قبل ما تاخدم القرار المصيري بتاع تغيير الحارة، الرجاء (ابوس ايديكم) تبصوا في المراية الجانبية (اللي ناحية الحارة اللي هتنقلوا ليها) و متنقلوش غير لما تكونوا اديتم اشارة (أو دلدلتم دراعكم)  و شفتم وش العربية اللي وراكم في الجنب كامل متكامل فيرالمراية (اللي على نفس الجنب!!!!)… لو رفرف ماينفعش لأنكم هتلبسوا أو على أحسن تقدير هتعملوا بلبلة في الشارع و هتستحقوا الشتيمة

8- ياريت عملية النقل من حارة لحارة متخدش قرون تكفي لإنقراض فصائل، و ميغركوش ان الفصيلة البشرية غير مهددة بالإنقراض لأنها مهددة بأمراض ضغط و القلب و الجلطات

9- لما تشوفوا حد قدامكم بيدي اشارة علشان ينقل للحارة بتاعتكم، مش عيب ابدا تسمحوله حتى لو ده كان شارع الوالد

10-  مش عيب أبدا انكم تحترموا الناس اللي سايقة حواليكم و توسعولهم… بالعكس ده اسمه ادب و تحضر و ميخليكمش ابدا طيشة… لكن السواقة ببطئ شديد و غير مبرر في وسط ناس متوسط سرعتها أعلى منكم بطريقة ملحوظة يبقى استفزاز لأي استعدادات فقدان أعصاب عند اللي وراكم و اللي حواليكم، و متبقوش تزعلوا لو حد منهم وصفكم أي وصف غير مهذب

11- بلاش تقفوا مرة واحدة في وسط الشارع حتى لو ضربتوا انتظار… دي قمة الغباوة و عدم المسؤولية و لا يبررها اي شئ حتى لو فيه نسكافيه سخن مغلي وقع عليكم

12- لو هتنزلوا حد من العربية  أو هتركبوا حد، يا ريت على جنب و بعد ما تضربوا انتظار و تحسوا ان الطريق مش هيعاني و فهموا اللي هيركب أو هينزل ان مش لازم بوس و أحضان قدام الشعب الغفير الغاضب حتى لو كانت ست الحبايب و نفسها تفيض بحنانها في الساعة السودا دي

13-  بلاش تركنوا صف تاني اللهم الا لو قاعدين في العربية أو عينكم عليها أو سايبين مفتاحها

14- بلاش تسوقوا عكسي

15- لو سايقين في شارع اتجاهين و العربيات ماشية صف واحد و الصف ده وقف، بلاش تستنصحوا و تمشوا في الصف التاني المعاكس “انقاذا للوقت” لأنكم كدة بتعملوا مصيبة و بتعطلوا نفسكم و اللي حواليكم و اللي جايين في وشكم و بتستحقوا كل أنواع الإهانة اللي ممكن توصل لإهانة جسدية خصوصا لو تطاولتم و عملتوا أصحاب حق

16- لو شارع ضيق و مضطرين توسعوا للي جايين عكسي (سواء كان حقهم أو لأ – ماحنا قلنا تربية الناس في الشارع صعبة)، بلاش عند و كبس لأنها بتقلب غم و أحيانا قلة أدب… المسألة ببساطة مسألة ذوق و حسبة مين جنبه أوسع، ف نستحمل بعض عشان نعدي

و دي الحاجات اللي افتكرتها لأني اضطريت للتعامل معاها النهاردة… أكيد فيه أكتر

لو بقى حد صادفته واحدة عمالة بتجز على سنانها و بتبرطم و بتقول شتايم عبيطة و وشها بيحمر و على أسوأ تقدير بتقول “اييييييييييييييييييييه” بصوت رجولي عالي… يبقى حضرتك لسة مستغبي/مستغبية عليا و أنا غير مسؤولة عن أي تصرف غير حضاري يبدر مني لأني فعلا هكون خرجت عن شعوري

* شيلوا “الإخوة و الأخوات” و حطوا اي لفظ بذئ يحضر في أذهانكم لما تتخيلوا الموقف

Advertisements

~ by insomniac on March 8, 2011.

One Response to “ارحموا اهلي بقه!”

  1. 3agbny el post. ne3mel eh bas 3ashan el nas tefham :(

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: